2Sa 10 | NdeIBE | STEP | Ngokuqhubeka kwesikhathi, inkosi yama-Amoni yafa, kwathi uHanuni indodana yayo waba yinkosi esikhundleni sayo.

2 Samuel 10

UDavida wehlula ama-Amoni

1 Ngokuqhubeka kwesikhathi, inkosi yama-Amoni yafa, kwathi uHanuni indodana yayo waba yinkosi esikhundleni sayo. 2 UDavida wacabanga wathi, “Ngizakuba lomusa kuHanuni indodana kaNahashi, njengoyise owayelomusa kimi.” Ngakho uDavida wathuma izithunywa ukuyakhalela uHanuni ngoyise. Kwathi abantu bakaDavida sebefikile elizweni lama-Amoni, 3 izikhulu zama-Amoni zathi kuHanuni inkosi yazo, “Kambe ucabanga ukuthi uDavida uyamhlonipha uyihlo ngokuthuma abantu ukuthi bazekukhalela na? UDavida kabathumanga ukuba bazekhangela idolobho balihlole njalo balichithe na?”

4 Ngakho uHanuni wabamba abantu bakaDavida, waphuca ingxenye yezindevu zomunye lomunye wabo, waquma izigqoko zabo phakathi ezinqeni, wasebaxotsha.

5 Kwathi uDavida esekutsheliwe lokhu wathuma izithunywa ukuyahlangabeza abantu labo ngoba babeyangiswe kakhulu. Inkosi yathi, “Hlalani eJerikho izindevu zenu zize zikhule beselibuya-ke. 6 Kwathi ama-Amoni ebona ukuthi ayeseliphunga elibi emakhaleni kaDavida, aqatsha izinkulungwane ezingamatshumi amabili zamabutho ama-Aramu ahamba ngezinyawo evela eBhethi Rehobi kanye leZobha, ndawonye lenkosi yaseMahakha labantu abayinkulungwane, labanye abayizinkulungwane ezilitshumi lambili abavela eThobi.

7 UDavida esezwe lokhu wakhupha uJowabi lebutho lonke lamadoda empi.

8 Ama-Amoni aphuma ajama evivele impi ekungeneni kwesango ledolobho lawo, lapho ama-Aramu aseZobha kanye leRehobi labantu beThobi kanye leMahakha babebodwa egangeni.

9 UJowabi wabona ukuthi kwakuleviyo lamabutho phambi kwakhe langemuva kwakhe, wakhetha abanye bezingwazi ezithenjiweyo ko-Israyeli wabahlela ukuba bamelane lama-Aramu. 10 Abanye wathi kabalawulwe ngu-Abhishayi umfowabo, wabahlela ukuba bamelane lama-Amoni. 11 UJowabi wathi, “Uma ama-Aramu elamandla kakhulu kulami, uzengihlenga; kodwa uma ama-Amoni elamandla kakhulu kulawe, ngizakuzakuhlenga.

12 Qina silwele abantu bakithi lamadolobho kaNkulunkulu wethu ngesibindi. UJehova uzakwenza okuhle emehlweni akhe.”

13 Emva kwalokho uJowabi lamabutho ayelaye baqhubeka ukuba balwe lama-Aramu, asebaleka phambi kwakhe. 14 Kwathi ama-Amoni ebona ukuthi ama-Aramu ayebaleka, ebaleka phambi kuka-Abhishayi aya phakathi kwedolobho. Ngakho uJowabi waphenduka ekulweni lama-Amoni waya eJerusalema.

15 Kwathi ama-Aramu ebona ukuthi ama-Israyeli ayewaqothule, aqoqana futhi.

16 UHadadezeri wabiza ama-Aramu ngaphetsheya komfula; aya eHelamu loShobhaki umlawuli webutho likaHadadezeri ewakhokhele.

17 Kwathi uDavida esekutsheliwe lokhu, wabuthanisa u-Israyeli wonke, wachapha iJodani waya eHelamu. Ama-Aramu aviva ukuba ahlangane loDavida asesilwa laye. 18 Kodwa abaleka phambi kuka-Israyeli, njalo uDavida wabulala abatshayeli bezinqola zabo zempi abangamakhulu ayisikhombisa lamabutho ahamba ngezinyawo ayizinkulungwane ezingamatshumi amane. Wagalela loShobhaki umlawuli webutho lawo, wafela khonapho.

19 Kwathi amakhosi wonke ayeyizichaka zikaHadadezeri ebona ukuthi wayesehlulwe ngu-Israyeli, enza ukuthula labako-Israyeli aba ngaphansi kombuso wabo. Ngakho ama-Aramu esaba ukusiza ama-Amoni futhi.